Nome do autor:admin

A Escola Municipal de Artes Escénicas (EMAE), logo de celebrar hai unhas semanas o seu 20 aniversario, abre o prazo de inscrición de alumnado para o novo curso 2023-2024. Os grupos ofertados serán catro: Grupo infantil (a partir dos 6 anos), Grupo Xuvenil (a partir dos 10 anos), Grupo Adultos (+18 anos) e Grupo Danza (a partir dos 40 anos). Todos os alumnos e alumnas interesadas deberán dirixirse ao departamento de Cultura do Concello da Estrada ou chamar ao teléfono 986573601. As prazas adxudicaranse por rigorosa orde de inscrición. As clases darán comezo no mes de outubro e todo o novo alumnado disporá de dúas clases de cortesía antes de formalizar a súa matrícula. Máis info: http://www.emae.aestrada.gal/index.php

A Escola Municipal de Artes Escénicas (EMAE) saca 10 prazas para o taller de Humor para torpes, impartido polo actor catalán Joan Strader que terá lugar os días 2 e 3 de decembro, un taller baseado na cración do gag cómico. O taller estrutúrase en catro partes: A búsqueda do simple, deconstruír e construír, creatividade para crear pezas únicas e orixinais e consciencia a través do risco de atreverse a fracasar. Comezará o venres día 2 no Museo do Moble e da Madeira de 16.30h a 20.30h, continuará o sábado no Teatro Principal de 10.30h a 13.30h e rematará a tarde do sábado cunha exhibición aberta ao público a partir das 20.00h. O prezo do taller é de 30,00€. Todos os interesados/as poden dirixirse ao departamento de Cultura do Concello da Estrada ou chamar ao teléfono 986573601.

Que grande nova! O xurado da Mostra de Teatro Afeccionado Labarta Pose escolleu as cinco obras finalistas que se representarán na súa quinta edición.  Entre as cinco , figura a peza da Escola Municipal de Artes Escénicas da Estrada Sobre o mal que fai o tabaco, escrita por Anton Chejov. Unha peza dirixida por Santiago Cortegoso, protagonizada polo actor Gonzalo Valcárcel e na que colabora o Obradoiro de Música Moderna Carlos Barruso. Todo un estímulo para seguirmos enchendo de vida os escenarios! O 7 de maio, achegarémonos ao auditorio de Zas para participar na gran fiinal.

O mércores 13 de outubro, leváronse a cabo as presentacións dos cursos Infantil (8-11), Xuvenil (12-13), Xuvenil (+13) e Danza para mulleres maiores de 40 anos. Foi un momento moi ilusionante, co nacemento dun novo grupo e a consolidación dun proxecto docente, que da man, do profesorado, vén gozando do apoio da veciñanza. Serán 5 os grupos e 78 os alumnos que boten a andar este curso.

Tras o éxito acadado na estrea do mes de outubro, o Principal volve acoller este venres 28 de maio unha nova entrega de Sobre o mal que fai o tabaco, peza interpretada por Gonzalo Valcárcel, dirixida por Santiago Cortegoso e acompañada musicalmente por Juan Núñez, Manuel Castedo e Pablo Bernárdez. Os convites poderán recollerse no Departamento de Cultura. Non faltedes!

Será mañá sábado cando o Festival de Danza, que terá lugar entre o 23 e o 25 de abril na nosa vila, levante o pano coa celebración de tres obradoiros de iniciación á danza impartidos por Paula Quintas. Pola mañá serán os grupos infantil e xuvenil da EMAE os destinatarios do obradoiro. Xa na sesión de tarde, ás 16.00 h será a quenda das academias de baile Sondodance e Absolute, e ás 18.00 h, o tecido asociativo de mulleres da Estrada, complementado tamén coa alumnas do grupo de adultos da Escola Municipal de Artes Escénicas.

Será ás 11.00 h este vindeiro sábado 6 de marzo. O Teatro Principal abrirá as súas portas para gozar da nova peza da compañía Traspediante na que traballa a nosa profe Paula Quintas. Unha proposta que revisa o mito da Cincenta en clave de igualdade cunha proposta visual ambientada na estética do Ballet Triádico de Oskar Schlemmer (Bauhaus, 1922). Antes da peza, o elenco técnico dirixiralle ao alumnado unhas palabras sobre distinas premisas da montaxe. Agardamos impacientes esta preestrea!

Será o vindeiro venres día 23 no Teatro Principal ás 21.00 h, aínda que un día antes farase unha preestrea con alumnos da propia Escola. Adaptada e dirixida por Santiago Cortegoso e interpretada por Gonzalo Valcárcel, e tres músicos do Obradoiro de Música Moderna Carlos Barruso (Pablo Bernárdez, Juan Núñez e Manuel Castedo), Sobre o mal que fai o tabaco é un monólogo de Antón Chéjov escrito en 1886 que reflicte ese momento da vida no que un procura inutilmente a felicidade. O texto refórzase con outros fragmentos de contos do autor ruso e diversas pezas musicais, ata completar unha obra de preto de 50 minutos de duración. Recolle o teu convite no Dpto. de Cultura do Concello da Estrada. A capacidade da sala verase limitada a un máximo de 99 espectadores.